करिब एक वर्षपछि मैदान फर्किएका ब्राजिली फरवार्ड नेयमारलाई पुनः चोट लागेको छ ।
एएफसी च्याम्पियन्स लिग एलिटमा साउदी क्लब अल हिलालले इरानको एस्टेगलाललाई ३–० ले पराजित गरेको खेलमा नेयमारलाई चोट लागेको हो।
नेयमार दुई साता अघि मात्रै चोटमुक्त हुँदै मैदानमा फर्किएका थिए थए । तर, दुई खेलपछि नै नेयमार फेरि घाइते भएका हुन् । एस्टेगलालविरुद्ध ५८औं मिनेटमा अब्दुल्लाह अल हम्दानको स्थानमा मैदानमा छिरेका ३२ वर्षीय नेयमारले निर्धारित समयको खेल सकिन तीन मिनेट बाँकी रहँदा असहज महसुस गरेका थिए ।
पेनाल्टी क्षेत्रमा बल अगाडि बढाइरहँदा असहज महसुस गरेका उनलाई ८७औं मिनेटमा मोहम्मेद हमाद अल क्वातानीले प्रतिस्थापन गरेका थिए ।
उनको चोट के कस्तो हो क्लबले कुनै जानकारी गराएको छैन । साउदी प्रो–लिगमा दर्ता नभएका कारण नेयमारलाई अर्काे खेलअघि निको हुने पर्याप्त समय छ । एएफसी प्रतियोगिताको अर्को खेल नोभेम्बर २५ मा हुनेछ ।
